امارتِ شرعیہ کے قیام کا مقصد و حدتِ امت، اقامتِ دین اور اس کی اشاعت ہے، اس مقصد کے لیے امارتِ شرعیہ کے ذمہ دار اور تمام کارکنان ہمیشہ کوشاں رہے اور ہیں، الحمدللہ بڑی حد تک کامیاب بھی ہیں۔ امارتِ شرعیہ نے تعلیمی میدان میں بیش بہا خدمات انجام دیں، مقامی بچوں کی تعلیم کے لیے ’’قاضی نورالحسن میموریل اسکول‘‘ اور ’’تحفیظ القرآن‘‘ کا قیام عمل میں آیا، جس میں پچاس (۵۰)سے زائد بچے حفظ کرتے ہیں اور سبھی کے سبھی مقامی ہیں۔ پورے بہار، اڈیشہ میں گاؤں اور گھر گھر علم کی روشنی پہونچانے کے لیے مکاتب قائم کئے جارہے ہیں، خاص طور سے غریب اور پسماندہ علاقوں میں۔ افتاء اور قضاء کی تربیت کے لیے (المعہد العالی للتدریب فی القضاء والافتاء) کے نام سے بے مثال ادارہ پھلواری شریف میں قائم کیا گیا ہے، جس کی شاندار سہ منزلہ عمارت تیار ہے، جس میں (۵۰) علماء و فضلاء کی تربیت کا انتظام ہے، ٹیکنیکل تعلیم کے لیے پھلواری شریف، دربھنگہ، مغربی چمپارن اور پورنیہ میں ٹیکنیکل انسٹی ٹیوٹ قائم کیا گیا ہے اور دوسرے مقامات پر بھی قائم کرنے کا ارادہ ہے۔ آزاد عربی مدارس کی تعلیمی و تربیتی نظام کو درست کرنے اور ان کے معیار کو بلند کرنے کے لیے ’’وفاق المدارس الاسلامیہ‘‘ (بہار) قائم کیا گیا، جس کے ذریعہ ملحق تمام مدارس کا امتحان ہوتا ہے، سب کا نصاب ایک ہے، کافی دنوں سے یہ عزم تھا اور اس کی فکر بھی تھی کہ امارتِ شرعیہ کی نگرانی میں پھلواری شریف میں ایک معیاری ادارہ قائم کیا جائے جس میں فضیلت تک کی معیاری تعلیم ہو؛ بلکہ فضیلت کے بعد فقہ، حدیث، تفسیر اور دیگر علوم میں تخصص کی بھی تعلیم ہو اور تربیتی معیار بلند ہو۔ میں کہ سکتا ہوں کہ یہ فکر تنہا میری یا امارتِ شرعیہ کے کارکنوں کی نہیں؛ بلکہ پورے بہار و اڈیشہ کے مسلمانوں کی ہے، عوام و خواص سب کے دل کی یہ آواز ہے۔ الحمدللہ اس کے لیے پانچ بیگھہ زمین خرید لی گئی ہے، مزید کچھ زمین لینے کا ارادہ ہے، میں نے اپنے کارکنوں اور حضرت مولانا قاضی مجاہد الاسلام صاحب قاسمی نائب امیرِ شریعت بہار و اڈیشہ سے اس موضوع پر گفتگو کی، سب کی رائے یہ ہوئی کہ مذکورہ زمین پر تعمیر سے قبل ہی شوال المکرم سے دارالعلوم امارتِ شرعیہ کا قیام عمل میں آجائے۔ چنانچہ پوری امتِ مسلمہ خوشخبری کا پیغام سناتے ہوئے یہ اعلان کیا جاتا ہے کہ مؤرخہ ۲۰؍شوال المکرم ۱۴۲۰ھ بمطابق ۲۸؍جنوری ۲۰۰۰ کو دارالعلوم امارتِ شرعیہ (دارالعلوم الاسلامیہ پہلا نام یہی تھا بعد میں کسی وجہ سے تبدیل کردی گئی) کا قیام عمل میں آئے گا، فی الحال اعدادیہ، عربی اول اور عربی دوم تک کی تعلیم ہوگی۔ عربی اول اور عربی دوم میں امدادی اور غیر امدادی دونوں طرح کے طلبہ کا داخلہ ہوگا، ان کی رہائش کا نظم بھی ہوگا۔اعدادیہ میں صرف مقامی بچوں کا داخلہ ہوگا ، جو پڑھ کر اپنے گھر چلے جائیں گے داخلہ کے خواہش مند طلبہ اپنی درخواست ۵؍شوال بنام ناظم صاحب امارتِ شرعیہ پھلواری شریف ، پٹنہ، پِن نمبر: ۸۰۱۵۰۵ بھیج دیں اور ۱۲؍شوال ۱۴۲۰ھ بمطابق ۲۰ جنوری ۲۰۰۰ ء کو حاضر ہو جائیں۔ ۱۳؍شوال ۱۴۲۰ھ کو داخلہ امتحان ہوگا، ان میں کامیابی کے بعد داخلہ لیا جائے گا۔ (حضرت مولانا سید نظام الدین صاحبؒ ) امیرِ شریعت امارتِ شرعیہ بہار و اڑیسہ

حضرت مولانا سید نظام الدین صاحبؒ, امیرِ شریعت امارتِ شرعیہ بہار و اڑیسہ